Peppernøtter

Peppernøtter er nydelege små julekaker som er kjempekjekke å gi bort i gåve! Heimelaga julegåver er kjekt, og av denne store deigen blir det maaange gåver ;)

Du treng:

500 gr smør (ekte smør, ikkje margarin)
750 gr sukker
1 dl fløyte
250 gr sirup (eg bruke lys)
saft og skal av 1 økologisk sitron (berre det gule skalet, det kvite like under er meir beiskt)
180 gram mandlar – skolda og finhakka.
1 bit/drope roseolje (det får du bl.a. på apoteket, ser ut som ein sukkerbit og kostar ca 20 kr.)
1250 gram kveitemjøl
2 toppa ts pottaske (eller kaliumkarbonat på fint. Denne får du også på apoteket, til om lag 140 kr… Spleis gjerne med andre som skal baka til jul!)
4 ts kanel
2 ts kardemomme

Slik gjer du:

Begynn med mandlane: Mandlane skal vera skolda, og det gjer eg ved å koka dei i litt vatn i 1-2 minutt. Vatnet må dekka mandlane godt og vel. Hell så vatnet av mandlane, og skvis den kvite kjernen ut av skalet. Skalet av mandlane kan du kasta, det er dei kvite kjernane som skal brukast. La dei tørka litt, og finhakk mandlane.

Smelt smøret i ei stor gryte. Rør inn sukkeret. Rør så i fløyte, sirup, sitronsaft og sitronskal, mandlar og roseolje. Du kan godt halda fram med å blanda deigen i gryta, eller ta den over i ein bakebolle. Bland det tørre for seg: Kveitemjøl, kanel og kardemomme, og sikt pottaska godt med tesil. Ha det tørre så oppi smørblandinga. Bland godt!

Så skal det trillast og trillast og trillast og trillast. Deigen er stor, så du kan jo vurdera å laga halvparten, eller ein fjerdedel. Eg lagar kulene med ca 1 cm diameter. Det går an å laga dei litt større – det er smak og behag! I og med at deigen er så stor, så er det lurt å ikkje ta all uttrilling i eitt – særleg om ein er åleine. Du kan oppbevara deigen i kjøleskåpet i ein tett boks eller i ei gryte med lok i eit par dagar. Eit tips er også å dela deigen i fleire små stykke og pakka inn i plast før du set i kjøleskåpet. Deigen vert veldig hard, og er litt vanskeleg å få laus frå gryta eller bollen etter kvart som du skal baka.

Omnar varierer litt med tanke på steiketid, men prøv gjerne å steika ved 180 grader i 9 minutt – det passar fint her :)

Oppbevar peppernøttene tørt og tett. Og litt vekke frå kjøkkenbenken dersom du vil at dei skal vara til jul ;) Peppernøttene er perfekte smågåver før jul, eller til julegåve. Bruk gjerne små tomme syltetøyglas, babymatglas eller fetaostglas og pynt dei litt, og vips så har du ei kjempekoseleg gåve!